Mae cynghorau wedi dangos hyblygrwydd, arloesedd, cadernid ac ymatebolrwydd yn ystod pandemig COVID. Mae’r argyfwng wedi dangos gallu cynghorau i ymateb ac wedi cadarnhau pwysigrwydd sybsidiaredd a lleoliaeth, gydag aelodau etholedig a’r gweithlu â’u gwreiddiau’n ddwfn yn eu cymunedau lleol.
Dyma pam ein bod yn gwthio maniffesto mentrus ar gyfer lleoliaeth cyn etholiadau’r Senedd, gan nodi ein blaenoriaethau i gyflawni canlyniadau gwell a mwy cynaliadwy ar gyfer ein cymunedau.
Gall canolbwyntio ar wasanaethau ataliol, gyda mwy o hyblygrwydd i ymateb i anghenion lleol, alluogi cynghorau i:
- hyrwyddo lles ac annog cymunedau iach, cynaliadwy a bywiog
- gwella canlyniadau i blant a phobl ifanc a dysgwyr
- sicrhau gwasanaethau gofal cymdeithasol cynaliadwy o ansawdd da ar gyfer y dyfodol
- creu cartrefi o ansawdd da a chymunedau mwy diogel i bobl fyw a gweithio ynddynt
- cefnogi twf cynhwysol cynaliadwy ac adferiad gwyrdd yn dilyn COVID
Mae CLlLC yn credu y bydd fframwaith lleol, sy’n seiliedig ar egwyddorion partneriaeth, parch a sybsidiaredd gyda chynghorau’n cael eu hannog a’u cymeradwyo, gan dderbyn cyllid teg a rhyddid lleol, yn arwain at ganlyniad gwell ar gyfer ein cymunedau amrywiol a darpariaeth uchelgeisiau’r Senedd ar gyfer Cymru. Rydym yn cyflwyno ein maniffesto i chi.