Mae llywodraeth leol yng Nghymru wedi chwarae rhan hanfodol wrth groesawu a chefnogi ffoaduriaid a cheiswyr lloches ledled y wlad, gan gynnwys y rhai sy'n ffoi rhag gwrthdaro yn Wcráin ac Afghanistan.
Mae cynghorau'n parhau i weithio mewn partneriaeth â Llywodraeth Cymru a'r DU, byrddau iechyd, sefydliadau gwirfoddol, a chymunedau lleol i ddarparu llety diogel, mynediad at wasanaethau, a llwybrau i integreiddio.
Wrth i Wythnos Ffoaduriaid 2025 gael ei nodi ledled y DU, mae CLlLC yn tynnu sylw at bwysigrwydd ymdrechion lleol i wneud Cymru yn Genedl Noddfa go iawn.
Dywedodd y Cynghorydd Mary Ann Brocklesby, llefarydd ar ran Cyfiawnder Cymdeithasol CLlLC:
"Yr Wythnos Ffoaduriaid hon, rydym yn falch o gydnabod y tosturi a'r ymrwymiad a ddangosir gan ein cymunedau i Gymru fod yn Genedl Noddfa. Mae Cynghorau Cymru yn cefnogi Llywodraeth y DU gyda llety a chefnogaeth ceiswyr lloches gwasgaredig, trosglwyddo plant digyfeiliant ac maent wedi croesawu dros 800 o ffoaduriaid o Afghanistan ers 2021 a dros 8000 o Wcreiniaid i Gymru ers y rhyfel yn yr Wcráin ers 2022, gan gynnig nid yn unig noddfa, ond gobaith a chyfle i fywyd newydd.
"Mae'r gefnogaeth a'r croeso cynnes a gynigir gan gymunedau lleol a chymdeithas sifil wedi bod yn allweddol wrth helpu pobl i deimlo'n ddiogel, yn cael eu gwerthfawrogi ac yn rhan o'u cymuned. Mae gan y gweithredoedd hyn o undod y pŵer i drawsnewid bywydau ac rydym wedi gweld enghreifftiau di-ri o hyn ledled Cymru.
"Er enghraifft, yn Abertawe, daeth gwirfoddolwyr lleol a grwpiau cymunedol at ei gilydd i greu canolfan groeso amlieithog, gan gynnig dosbarthiadau Cymraeg a Saesneg, cyfeiriadedd diwylliannol, a chylchoedd cyfeillgarwch fel rhan o'r fenter "Gwell Croeso i Abertawe".
"Nid yw ymfudwyr a ffoaduriaid yn unig yn derbynwyr cefnogaeth, maen nhw'n aelodau annatod o'n cymunedau, gan gyfoethogi cymdeithas gyda'u sgiliau, gwytnwch a diwylliant. Maent yn gwirfoddoli, yn dysgu Cymraeg a Saesneg; ac ymdrechu i fod yn rhan o'r gymuned leol ac ehangach yng Nghymru.
"Does gen i ddim amheuaeth y byddwn yn parhau i harneisio pŵer partneriaeth a chymuned i ddarparu'r amodau ar gyfer diogelwch ac integreiddio.
"Gyda'n gilydd, rydym yn gweithio tuag at Gymru sy'n wir yn bodloni ei gwerthoedd fel Cenedl Noddfa."