Mae Cyngor Sir Ceredigion yn sylweddoli bod y cyfnod hwn wedi bod, ac yn parhau i fod yn gyfnod anodd iawn i bawb. Nid yw plant na phobl ifanc wedi gallu treulio amser gyda ffrindiau, cyfoedion na staff cymorth fel gweithwyr ieuenctid - staff y mae llawer ohonynt yn ystyried yn oedolion y gallan nhw ymddiried ynddynt. Ceir tystiolaeth gynyddol bod diffyg rhyngweithio o’r fath yn effeithio ar iechyd a lles meddyliol ac emosiynol pobl ifanc. O ganlyniad, mae'r Cyngor yn paratoi ac yn cynllunio i ailagor darpariaethau wyneb yn wyneb fel canolfannau ieuenctid. Bydd yn gwneud y canolfannau yn ddiogel, addysgiadol ac yn hwyl. Mae’r Canllawiau i Staff yn ddogfen ar gyfer staff sy’n darparu cymorth ac ymyraethau o fewn canolfannau ieuenctid yr awdurdod lleol. Fodd bynnag, bydd llawer o’r agweddau yn berthnasol i leoliadau teuluoedd ac addysgol eraill ac yn cyd-fynd ag amcanion COVID-19 Cyfnod 3: Addasu a Chydnerthedd Hirdymor y Cyngor.

Dalier sylw: Mae’r canllawiau hyn yn seiliedig ar yr wybodaeth ddiweddaraf (18 Mehefin 2020) a byddant yn cael eu diweddaru yn ôl yr angen.

Mae Tîm Digartrefedd Ymhlith Pobl Ifanc Sir Benfro wedi addasu ei arferion i ymgysylltu, addysgu, rhoi gwybod a chynorthwyo pobl ifanc a gweithwyr proffesiynol. Mae’r mentrau hyn yn cynnwys: Cyrsiau Sgiliau Tenantiaeth ac Ymwybyddiaeth o Ddigartrefedd wedi’u darparu ar ffurf rhaglen ddysgu cyfunol; Sesiynau Rhyngweithiol gyda mynediad i weithwyr ieuenctid, yn ogystal ag ystorfa o adnoddau ac ystod o heriau, cwisiau, tasgau gwaith a fideos, wedi’u cynnal ar lwyfan Rhith-amgylchedd Dysgu. Bydd gwaith yr unigolion yn cael ei osod a’i fonitro drwy’r llwyfan hwn ond mi fydd yna gyfle i wneud apwyntiad i ddod i’n hamgylchedd dysgu yn y Ganolfan Byw'n Annibynnol. Bydd y sesiynau hyn yn cael eu cynllunio i gyd-fynd â cherrig milltir dysgu allweddol a gyrhaeddir yn y Rhith-Amgylchedd Dysgu. Bydd y rheiny sydd heb sgiliau TGCh i gwblhau’r tasgau ar y llwyfan hwn yn cael cynnig sesiynau wyneb yn wyneb ychwanegol a bydd y rheiny heb ddyfais briodol yn cael benthyg un.

Ers dechrau pandemig COVID-19 a’r mesurau cadw pellter cymdeithasol, mae Gwasanaeth Ieuenctid Torfaen wedi bod yn rhan o dîm sy’n cynnal hyb ysgolion uwchradd ar gyfer plant gweithwyr allweddol a phobl ifanc diamddiffyn. Prif rôl y Gwasanaeth Ieuenctid oedd hwyluso a darparu gweithgareddau i’r bobl ifanc. Yn ogystal â hyn, gan weithio’n agos â Gwasanaethau Gofal Cymdeithasol a Chynhwysiant, fe greodd y Gwasanaeth Ieuenctid hyb bychan yn un o’i ganolfannau ieuenctid ar gyfer ychydig o bobl ifanc hynod o ddiamddiffyn a oedd angen mwy o gefnogaeth. Roedd yr hyb yn cynnig cyfleoedd i’r bobl ifanc goginio, garddio a chymryd rhan mewn gweithgareddau meithrin tîm ac ati. Mae’r bobl ifanc wedi ymgysylltu’n annibynnol â gweithgareddau'r hyb er bod rhai ohonyn nhw’n cael cymorth 1 i 1 i gael mynediad at ddysgu ffurfiol. Mae @torfaenyouth wedi bod yn lle diogel y gall pobl ifanc sy’n bryderus ynghylch eu rhieni a’u perthnasau ei fwynhau a'i werthfawrogi.