Mae Cymdeithas Llywodraeth Leol Cymru (CLlLC) wedi croesawu cyhoeddiad Llywodraeth Cymru o £20 miliwn yn ychwanegol i ysgolion yn 2024-25.

Bydd y cyllid hwn yn cael ei ddyrannu drwy'r Grant Safonau Ysgolion a bydd yn darparu cymorth i ysgolion sy'n wynebu heriau penodol, gan gynnwys y rhai sydd mewn mesurau arbennig.

Mae ysgolion ledled Cymru wedi bod yn delio â phwysau ariannol cynyddol ac mae awdurdodau lleol wedi bod yn gweithio'n agos gydag ysgolion i liniaru'r heriau hyn.

Dywedodd y Cynghorydd Lis Burnett, llefarydd CLlLC dros Addysg:

"Mae'r cyllid ychwanegol hwn i ysgolion yn gam i'w groesawu, ac mae'n galonogol gweld Llywodraeth Cymru yn ymateb i'r pryderon y mae cynghorau ac ysgolion wedi'u codi.

"Mae ysgolion yn parhau i wynebu pwysau ariannol, yn enwedig mewn meysydd fel Anghenion Dysgu Ychwanegol, costau staffio, a darpariaeth addysg ehangach. Gyda chyllid digonol, cynaliadwy, gall cynghorau ac ysgolion barhau i gyflawni eu dyletswyddau statudol, darparu addysg o ansawdd uchel, a chefnogi dysgwyr i gyrraedd eu potensial llawn.

"Mae sicrwydd ariannol hirdymor yn hanfodol i ddarparu safonau uchel o addysg, ac rydym yn annog Llywodraeth Cymru i barhau i weithio'n agos gyda chynghorau i ddarparu cyllid cynaliadwy sy'n caniatáu i ysgolion gynllunio ymlaen yn hyderus.

"Mae’r CLlLC yn awyddus i barhau i weithio mewn partneriaeth â Llywodraeth Cymru a chynghorau ledled Cymru i sicrhau bod yr arian ychwanegol hwn yn gwneud gwahaniaeth gwirioneddol i ddisgyblion, staff a chymunedau ledled Cymru."